xasanaadkiisana ha ugu daro.

Daaboco Qoraalka
Xidh boggan

Tusmada qoraalka Bogga
Macnaha soonka……………………………………………………………………………………….1
Taariikhda soonka……………………………………………………………………………………..1
Qeybaha soonka……………………………………………………………………………………….1
Xikmadaha soonka…………………………………………………………………………………….1
Xukunka soonka bisha ramadaan………………………………………………………………..2
Fadliga doonka…………………………………………………………………………………………2
Goorma ayuu soonku waajib noqdaa?………………………………………………………….3
Yuu waajib ku yahay soonku?……………………………………………………………………..3
Qofka xanuunsan ama musaafirka ah maxaa u fadli badan?……………………………3 Qofka Gaboobay ama xanuunsan xanuun joogto ah……………………………………….3
Haweeneyda uurka leh, ama ilmo nuujisa……………………………………………………..4
Tiirarka soonka…………………………………………………………………………………………4 Maxaa soonka jebiya (buriya)?……………………………………………………………………4 Aadaabta Soonka……………………………………………………………………………………..5
Waxyaabaha u banaana qofka sooman ( mubaaxa u ah)…………………………………5
Soonka sunaha ah……………………………………………………………………………………..6
Maalmaha la diiday inla soomo…………………………………………………………………..6
Ictikaafka iyo fadliga 10ka danbe…………………………………………………………………7
Sakaatu fidriga…………………………………………………………………………………………..8
Salaada ciida……………………………………………………………………..……………………….……..9

Macnaha soonka:
Ereyga SOON asal ahaan waa erey carabi ah micnahiisuna waa: afxirasho . Micnaha Soonka xaga sharciga waa in ILAAHAY LOOGU CIBAADEYSTO in laga afxirnaado cuntada , cabitaanka iyo wax kasto oo ku afursiin kara, laga bilaabo waaga markuu baryo (addanka labaad ee salaada subax) ilaa qoraxdu ka dhacdo .
Taariikhda soonka:
Hadaan dib u fiirino taariiikhda waajibnimada soonka culimada islaamku waxay u qaybiyeen in soonku soo maray sadex marxaladood oo kala ah:
Marxalada koowaad: in la soomo maalinta 10ka bisha muxaram ee loo yaqaano Caashuuraa.kadib waa lanasakhay waxaana lagu nasakhay:
Marxalada labaad: oo ah inla soomo bisha ramadaan qofkii doonaya, qofka aan soomaynna uu bixiyo fidyo (quudiyo hal miskiin maalin kasta). Kadib waa lanasakhay waxaana lagu nasakhay:
Marxalada sadexaad: oo ah inay qof kasta oo muslim ah waajib ku tahay inuu soomo bisha ramadaan. ( hadii laga helo shuruuda aan dib ka soo sheegi doono).
Qaybaha Soonka:
Soonku wuxuu u qaybsamaa labo qaybood, kuwaas oo kala ah mid farad (waajib) ah iyo mid Sunno ah. Soonka waajibka ah ayaa wuxuu u sii qaybsamaa ilaa saddex qaybood, waxayna kala yihiin:

Soonka bisha Ramadaan ( oo aan ka hadli doono)
Soonka kafaaro-gudka
Soonka sharadka (nadarka).
Xikmadaha Soonka:
Lama soo koobi karo ujeedooyinka iyo xikmadaha ka danbeya soonka waxaana ka mid ah:
1: in allaah amarkiisa loo hogaansamo.
2: inuu dhaliyo soonku xasanaad badan iyo cabsi ilaahay.
3: In dadku ay dareemaan gaajada iyo darxumada, si ay u xasuustaan khaaliqooda abuuray, uguna naxariistaan fuqarada.
4: inuu allaah dadka simo oo kan taliya iyo kan loo taliyo, maalqabeenka iyo kan saboolka ah ay wada sooman yihiin si wadajir ahna u dareemayaan gaajada.
5: Soonku wuxuu dhaliyaa midnimo iyo sinnaan, isjaceyl iyo iskaashi.
iyo ujeedooyin kale oo aan halkan lagu soo koobi karin.

Xukunka Soonka bisha ramadaan :
Qof kasta oo muslim ah waxaa waajib ku ah Soonka bisha RAMADAAN . Waana tiir ka mid ah tiirarka Diinta Islamka, taasna waxaa daliil u ah oo cadeynaya kitaabka ilaahay, Sunaha Nebiga (S.C.W), iyo ijmaaca umadda:
Kitaabka: alle:
Alle weyne kor ha ahaadee wuxuu yiri:
(( Kuwa Alle iyo Nebigiisa rumeeyoow, waxaa leydinku waajib yeelay soonka, sidii loogu wajibyeelay dadkii idinka horeeyay oo kale, inaad alle ka baqdaan darteed)) Al-baqara (183).
Sunaha Nabiga:
Cabdilahi ibnu Cumar wuxuu yiri: Rasuulkii alle (scw) wuxuu yiri:
(( Islamka waxaa lagu dhisay shan.
1- Inaad qirtid ilaah xaq lagu caabudo inuusan jirin Ilaahay mooyaane, Nebi maxamedna yahay Rasuulkii ilaahay.
2- Inaad oogtid (tukatid) salaada.
3- Inaad bixisid sakada.
4- Inaad soo xajidid beytka ilaahay.
5- Iyo inaad soontid ramadaanka)).(Bukhari 1/49/8 ,muslim 1/20-45-16)
Ijmaaca umadda:
Umadda Islaamku waxay isku raacday in soonku yahay waajib,kana mid yahay tiirarka Islaamka, wuxuuna ka mid yahay soonku waxyaabaha lamahuraanka ah ee sida dhabta ah looga ogsoon yahay diinta islaamka, qofkii inkira waajibnimada soonka waa Gaal ka ridoobay Diinta Islaamka.
Fadliga Soonka:
- Abu Hureyra (R.D.C) wuxuu yiri: Rasuulkii Alle wuxuu yiri:
((Qofkii sooma Ramadaan isagoo rumaysan (Allah),ajarna raadinaya, waxaa loo dhaafaa danbigiisii hore)).(Bukhaari 4/110/1901. Muslim 1/523/760).
- Abuu Hureyra (R.D.C) wuxuu yiri : Rasuulkii Alle wuxuu yiri:
Alle kor ahaaye wuxuu yiri:
((Camal kasta oo bani,aadamku sameeyo isagaa iska leh, soonka maahane, Anigaa iska leh (soonka) anigaana ku abaalmarinaya. Soonku waa gaashaan.
Qofkiin haduu sooman yahay yuusan la imaan af-xumo,qaylo.iyo jaahilnimo, haddii qof ku caayo ama kula dagaalamo ku dheh “ waan soomanahay“ labo jeer.
Waxaan ku dhaartay Allaha Nebi maxamed naftiisu ku jirto gacantiisee, urta kasoo baxda qofka sooman afkiisa waxay ka udgoontahay Alle agtisa maalinta qiyaamaha udgoonka miskiga.
Qofka sooman wuxuu leeyahay labo farxadood, markuu afuro wuxuu ku farxaa afurkiisa, markuu Rabigiisa la kulmana wuxuu ku farxaa soonkiisa)).(bkhri 4/118/1904 mslm 1151).
Goorma ayuu waajib noqdaa soonka bisha ramadaan?
Soonku wuxuu waajib ku noqdaa labo arimood:
1-Bisha ramadaan oo uu arko ugu yaraan hal qof oo lagu kalsoon yahay, oo aan lagu aqoon faasiqnimo, aragtidiisuna ay fiican tahay, qof dumar ahba ha noqdee.
2-Bisha shacbaan oo ku dhamaata sodon maalmood.
Fiiro gaara: Ha soomin hana afurin kaligaa hadaad aragtid bisha, ilaa dadku wada soomaan ama wada afuraan. Ku dadaal midnimada muslimiinta, ka fogow wax kasta oo keenaya khilaaf.
Yuu waajib ku yahay soonku?
Wuxuu waajib ku yahay qofkasta oo ah:
1: Muslim.
2:Caqligiisu joogo.
3: Qaan-gar ah.
4: Caafimaadqab ku jooga meesha uu ku noolyahay.
5: Haweynayduna waa inay daahir ka tahay dhiiga-caadada ama ka dhalmada.
Qofka xanuunsan ama musaafirka ah maxaa u fadli badan?
Waxaa u fadli badan qofka xanuunsan ama musaafirka ah inuu soomo haddii uusan ku dhibaatoonayn, hadduu ku dhibaatoonayo waxaa u fadli badan inuu afuro, kadibna soo qalleeyo maalmihii uu afuray.
Qofka Gaboobay ama xanuunsan xanuun joogto ah (oo aan lala soomi Karin) Qofka aan awoodin inuu soomo gabow dartii, ama xanuunsan xanuun aan rajo laga lahayn inuu ka caafimaado waa inuu afuro, quudiyana (cunto siiyo) maalin kasta hal miskiin.
Fiiro gaara: Waxaa ku filan inuu halmar quudiyo sodon miskiin bisha ramadaan dhexdeeda ama dhamaadkeeda. Sidaana waxaa sameyn jiray Anas ibnu maalik (R.D.C) markii uu gaboobay soonkana awoodi waayey.
Haweeneyda uurka leh, ama ilmo nuujisa:
Haweeneyda uurka leh ama nuujisa ilmo haday u baqdo nafteeda ama ilmaheeda: waxay culimada islaamku isugu khilaafeen sadex qowl ama mad-hab oo kala ah:
1: Inay afurto kadibna soo qalleyso maalmihii ka tegay.
2: Inay afurto maalin kastana quudiso hal miskiin, qallena aan lagu lahayn.
3: Hadday ubaqdo nafteeda waa iney afurto, soona qalleyso, laakiin hadey u baqdo ilamaheeda uurka ku jira ama ay nuujineyso waxaa laga rabaa iney afurto, maalin kastana quudiso miskiin, soona qalleyso.
Waxaana ugu xoog badan mad-habka ugu horeeya.
Tiirarka soonka:
Tiirarka soonku waa labo tiir oo kaliya:
1-Inaad qalbiga ka niyeysatid habeen walba (oo ramadaan ah) inaad soomi doontid maalinta soo socota.
2-Inaad iska ilaalisid wax kasta oo soonkaaga jebinkara, laga bilaabo fajarka (runta ah) ilaa qoraxdu ka dhacdo.
Maxaa soonka jebiya (buriya)?
Waxaa soonka jebiya todobadan arimood oo laysku wada raacsan yahay :
1-Qofka oo gaalooba
2- Inuu qofku cuno ama cabo si ula kac ah (kas ah). Hadduu qofku cuno ama cabo isagoo hilmaansan (illowsan), ama lagu khasbo inuu cuno ama cabo (khasab uusan u lahayn awood uu isaga celiyo) kama furmayo soonkiisii lagamana rabo qalle iyo kafaaro.
3-Inuu qofku matago (hunqaaco) si ula kac ah. Hadduu kasoo fakado kama furmayo soonkii lagamana rabo qalle iyo kafaaro.
4-Dhiiga caadada ama dhalmada. Haba yimaado daqiiqad ka hor inteysan qoraxdu dhicin. Waxaana laga rabaa iney soo qalleyso maalmihii ka tegay oo dhan.
5-Inuu qofku la yimaado Galmo maalinnimada ramadaanka: waxaa laga rabaa qofkii ay ka dhacdo arintan oo kale inuu soo qalleyo malintaas lana yimaado kafarooyinka soo socda mida uu ka awoodo,isaagoo u fiirinaya siday u kala horeeyaan.
A: Inuu xoreeeyo qoor.(Adoon ama Adoomad).
B: Inuu soomo labo bilod oo xiriir ah.
C: Inuu quudiyo lixdan miskiin.
6-In qofka lagu duro irbadda nafaqada keenta.
7-In qofku si kas ah isaga keeno manida. haddii uu si kas ah isaga keeno manida, waa inuu soo qalleeyo maalintaas, kafaarana lagama rabo.
Fiirogaar ah:
1-Haddii qofku ku riyoodo hurdada malinnimada ramadaanka manina ay ka timaado wax dhib ah ma saarna korkiisa.
2-Qofkii lagu adimo isagoo galmo ku dhex jira waa inuu isla markaa joojiyaa galmada, haduu sii watana kafaaro gudka aan soo sheegnay ayaa laga doonayaa iyo inuu maalintaa soo qalleeyo.
3-Hadii haweyneyda uu ka joogsado dhiiga caadada ama dhalamada habeenkii inta aan la adimin waa inay qubeysato adinka ka hor ama kadib waana khasab inay soonto. Qubeyska oo loo dib dhigo ilaa waagu (fajarku) ka soo baxo wax dhib ah uma keenayo soonka.
Adaabta Soonka:
Ku dadaal ilaalinta iyo dhawrista aadaabtan soo socota :
 Suxuurta: waxa ugu yar ee lagu suxuuran karo waa kabbo biyo ah (Cantuugo). Waxaana wanaagsan in dib loo dhigo suxuurta.
 Iska ilaali laqwiga, af-xumada,dagaalka, xanta ,beenta, markhaati kaca beenta ah, dhegaysiga heesaha, turubka , iyo wax kasta oo soonkaaga wax u dhibaya , ajarkaagana hoos u dhigaya ama tirtiraya kuligii.
 Ku dadaal Sadaqada.
 Ku dadaal akhrinta Qur’aanka.(ugu yaraan khatin hal mar bisha ramadaan).
 De-deji afurada oo ha sugin ilaa cirku ka madoobaado xidiguhuna soo baxaan.
 Bari ilaahay markaad afuraysid oo dheh:
«ذَهَبَ الظَّمَأُ، وَابْتَلَّتْ الْعُرُوقُ، وَثَبَتَ الْأَجْر؛ إِنْ شَاءَ الله.»
Taasoomacnahedu yahay: (Oonkii waa tegay,xididadiina waa qoyeen ,ajarkiina waan helay, hadii alle idmo).
 Markaaad afuraysid u afur sidan soo socota: oo ku dayo Nebigaaga (S.C.W). Nebigu wuxuu ahaa kii ku afura Rudab, haduu waayo timir, haduu waayo biyo.
 Ku dadaal taraawiixda iyo qiyaamka, waxaa laga helaa danbi dhaaf.
 Yareyso hurdada maalintii iyo habeenkii, uga faa’iidayso waqtigaaga cibaado gaar ahaan tobanka habeen ee ugu danbeeya Ramadaanka.
Waxyaabaha u banaana qofka sooman ( mubaaxa u ah).
• Qubeyska iyo is qaboojinta.
• Luq-luqashada ama san-daarashada, isagoon ku fogaaneyn.
• Toobinka. Haddii uusan awoodda qofka sooman wax u dhibayn.
• Liqidda candhuufta.
• Dhunkashada iyo waxyabaaha soo raaca hadii qofka soomani ka adagyahay xubintiisa taranka.
• Inuu qofka soomani waabariisto isagoo jinaabo qaba.
• Inuu xiriirin karo soonka ilaa suxuurta, hadduu awoodd u leeyahay.
• Isticmaalka Cadeyga, udugga,saliideysashada, indha-kuusha,goojada indhaha ama dhegeha, iyo irbadaha leysku mudo. (waa ineysan ahayn kuwa loo qaato cunto ahaanta sida: faleebada).
Soonka sunaha ah:
Rasuulkeena suuban (S.C.W) wuxuu na jecleysiiyay noona dar-daarmay inaan soono maalmahan soo socda.
• Lix maalmood oo ka mid ah bisha shawaal.(waana bisha ka danbeysa ramadaanka).
• Maalinta Carafo (Waa maalinta 9aad bisha 12aad taariikhda islaamka, soonkeedana waxaa lagu dhaafaa danbiyada sanadka lasoo dhaafay iyo kan soo socda). Maalintan waxay sunne u tahay inuu soomo qofkasta Marka laga reebo qofka xajinaya.
• Maalinta caashuuraa (waa maalinta 10aad bisha 1aad taariikhda islaamka soonkeedana waxaa lagu dhaafaa danbiyada sanadkii lasoo dhaafay). Waxaana fiican inaad wada soontid 9ka iyo 10ka muxarram.
• Inbadan inaan ka soono bisha muxarram.
• Inbadan inaan ka soono bisha shacbaan.
• Isniinta iyo khamiista.
• Sadex maalmood bil walba . waxaana ugu fiican sadexda cad-cad waa maalmaha 13aad 14aad iyo 15aad bil walba oo hijriya.
• Maalin dhaaf sanadka oo dhan.
• Tobanka ugu horreeya ee bisha dul-xijja.
Maalmaha la diiday in la soomo:
Maalmaha nalaga xarrimay inaan soono waxaaa ka mid ah:
 Labada ciidood . (Ciida Fidriga iyo Ciida Carafo).
 Maalmaha lagu magacaabo (Ayaamu-Tashriiq) .Waana sadexda maalmood ee ka danbeeya ciida Carafo 11aad 12aad 13aad.
 Maalinta Jimcaha kaligeed.Hadii aysan munaasabad ku imaan ama maalin ka horeysay ama ka danbeysa lagu xiriirin.
 Maalinta Sabtida kaligeed. Hadii aysan munaasabad ku imaan ama maalin ka horeysay ama ka danbeysa lagu xiriirin.
 Shan iyo tobanka danbe ee Shacbaan, hadaysan qofka caado u ahayn inuu soomo sanad kasta.
 Maalinta shakiga. Waa maalinta 30aad ee bisha shacbaan, hadaan la arag bisha ramadaan. Qofkii uu u socon jiray soon taxane ah mooyee.
 Sanadka oo dhan oo lawada soomo.
 Haweeneyda la qabo iney soonto (soon sunne ah) ninkeeda oo jooga ogolaansho la,aanteed.
Ictikaafka iyo fadliga 10ka danbe:
Ictikaafka macnihiisu waa: xabisid (nagaasho), taasoo loola jeedo inuu qofku isku xabiso ama ku nagaado misaajidka waqti go’an si uu u cibaadeysto.
Ictikaafka tobanka danbe ee Ramadaan waa sunne aad u wanaagsan kana sugan nebigeena (S.C.W), ictikaafku wuxuu kuu sahlayaa wadada kheyrka, iyo in lagu waafajiyo habeenka leylatu qadriga.
Alle wayne kor ahaaye wuxuu yiri:
ﭽ ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ ﭜ ﭝ ﭞ ﭟ ﭠ ﭡ ﭢ ﭣ ﭤ ﭥ ﭦ ﭧ ﭨ ﭩ ﭪ ﭫ ﭬ ﭭ ﭮ ﭯ ﭰ ﭱ ﭲ ﭳ ﭼ
((Anagaa soo dejinay (Quraanka) habeenka sharafta leh. Maxaa ku ogeysiiyay habeenka sharafta leh. Habeenka sharafta leh wuxuu ka kheyr badan yahay kun bilood . Waxay la soo degaan Malaa’igtu iyo malaku Jibriilba markuu alle u idmo kadib, Xukunka alle. Waa habeen nabadgelyo ah ilaa waagu ka soo baxo.) . Al-qadr (1-5)
- Caa’isha (R.D.C) waxay tiri:
(( Rasuulku wuxuu ahaa kii ictikaafa tobanka danbe ee ramadaan . wuxuuna oran jiray: ku dadaala leylatu qadriga , kana raadiya tobanka danbe)). Bukhaari & muslim.
- Caa’isha (R.D.C) sidoo kale waxay Nebiga (C.S.W) ka werisay inuu yiri:
((Ka raadiya leylatu qadriga tirada is dheer (kisiga) tobanka ugu danbeya ee ramadaan)) bukhaari iyo muslim.
Ku dadaal habeenkaa barakeysan inaad haleeshid adigoo ilaahay u taagan (cibadeysanaya), lagaana helay tilmaamahan soo socda.
- Abu-Hureyra (R.D.C) wuxuu yiri: Nebigu (S.C.W) wuxuu yiri:
((Qofkii istaaga habeenka leylatu qadriga (1) isagoo rumeysan (Allah), (2) ajarna raadinaya , waxaa loo dhaafaa danbigiisii hore)).Bukhaaaari iyo muslim.
Lama ictikaafi karo meel aan misaajid ahayn. Nebi Maxamedna (S.C.W) ma ictikaafin meel aan misaajid ahayn.
Waxaa u wanaagsan Qofka ictikaafsan inuu naftiisa ku mashquuliyo daacada ilaahay sida: Salaada, Akhrinta Qur’aanka,Tasbiixda ,Takbiirta, Tahliisha Istiqfaarta Salliga Nebiga (S.C.W), Baryada ilaahay, Barashada cilmiga ..iwm.
Waxaan u wanaagsaneyn qofka ictikaafsan inuu ku mashquulo hadal iyo ficil aan faa’iido u lahayn, sidoo kale waxaan fiicnayn inuu hadalka ka tago isagoo u maleynaya in aamusnaantu ilaahay u dhoweynayso xiliga uu ictikaafsan yahay.
Waxaa u banaan qofka ictikaaafsan inuu u baxo danihiisa lagama marmaanka ah, waxaa kale oo u banaan inuu shanleysto,timaha xiirto ama uu nadiifiyo jirkiisa.
Waxaa jebiya ictikaafka labo sheey oo kala ah:
o Inuu qofka ictikaafsani dan la’aan uga baxo misaajidka.
o Ama la yimaado galmo mudada uu ictikaafsan yahay.
Sakada fidriga:
Sakatu fidrigu waxay waajib ku tahay qof kasta oo muslim ah ( ha soomanaado ramadaankii ama yuusan soomanaan ha weynaado ama ha yaraado), waxaa loo shardiyaa inuu haysto wax ka badan quudkiisa iyo quudka ciyaalkiisa habeenka iyo maalinta ciida.
Wuxuuna ka bixinayaa naftiisa iyo cid kasta oo ay waajib ku tahay inuu biilo sida: xaaskiisa caruurtiisa , abihii iyo hooyadii hadaysan waxba haysan, shaqaalihiisa haday muslimiin yihiin…
Qof walba waxaa laga rabaa inuu bixiyo hal SUUS oo masago ah ama galley ama sareen ama timir ama sabiib ama wax kasta oo la quuto lana beego sida bariiska baastada burka iwm.
Halka SUUS wuxuu u dhigmaa qiyaastii 2,40 kg.
Lama siinayo sakaatu fidriga cidaan miskiin ahayn.
Waqtiga ugu wanaagsan in la bixiyo waa: salaada ciida ka hor, hadii laga hormariyo maalin ama labo maalmood wax dhib ah malaha. Wixii ka danbeeya salaada ciida hadii la bixiyo waa sadaqo caadi ah ee maaha sakatu fidri qofii cudurdaar leh mooyee.
Meesha aad ku nooshahay hadaad ka waydid dad fuqaro ah waad u diri kartaa meel kale oo ay joogaan fuqaro.
Way kuu banaan tahay inaad wakiilatid qof kale si uu kaaga bixiyo sakada.
Culimada badankeedu waxay qabaan inaan la bixin Karin lacag cadaan ah ee ay waajib tahay in lagu gaabsado waxyaaba la quuto.
Xikmadda ka danbeysa sakaatu fidriga waa: in loogu danbi dhaafo qofka muslimka ah gafafkii iyo khaladaadkii yar-yaraa ee ka dhacay intuu soomanaa, iyo in masaakiinta laga deeqo baryada maalinta ciida.
Waxaa wanaagsan in laga bixiyo sakaatu fidriga ilmaha uurka ku jira haduu ka wayn yahay Afar bilood.
Salaada ciida:
Salaada ciidu waa waajib saaran ragga iyo dumarka sida xooga badan . gabadhu haday caado qabto waa inay timaado goobta salaada si ay uga qaybgasho kulanka iyo ducada muslimiinta.
Waxaa sunne ah maalinta ciida:
1- Inaad qubeysatid
2- inaad dhar wanaagsan xiratid,
3- intaadan bixin cun dhawr xabo oo timir ah(ciidu fidriga), laakiin ciida carafo waxaa sunnne ah in uu qofku markuu soo noqdo wax ka cuno gawraciisa,ama wixii kale ee uu helo karo.
4- kala bedel wadada aad ku baxaysid iyo taad kusoo noqoneysid.
5- takbiiro markaad ka baxdid gurigaaga ilaa laga tukanayo(ciida fidriga) lakiin ciida carafo waxay takbiirtu bilaabmnaysaa habeenka ciida ilaa laga gaarayo casarka maalinta 13aad .
6- Waxaa kaloo sunne ah, in ladib-dhigo salaada ciidu-fidriga , laguna tukado goob fagaare ah. Laakiin ciida carafo waxaa sunne ah in la de-dejiyo.
Habka loo tukado salaada ciida: Rakcadda hore waxaa la takbiiranyaa todobo goor marka laga reebo takbiirta ixraamka. Rakcadda danbena waa shan takbiiradood marka laga reebo takbiirta lagu soo kacayo . Inta kale waxay kala mid tahay salaadaha.
Salaada ciidu malaha sunne ka horeeya ama ka danbeeya laakiin haday tahay meesha lagu tukanayo misaajid waa inaad tukatid labada rakcadood ee loo yaqaano (taxiyatul masjid).
وكـل عـــــــــام وأنـــتـــــم بخــــــــيـر
Qore : Cali Maxamuud Yuusuf Göteborg/Sweden 2007-09-01 .
Wixii talo tusaale iyo turxaan bixin ah ku soo dir (alwaziir30@hotmail.com)

Rad 1, Kolumn 1	Rad 1, Kolumn 2	Rad 1, Kolumn 3	Rad 1, Kolumn 4	Rad 1, Kolumn 5
Rad 2, Kolumn 1	Rad 2, Kolumn 2	Rad 2, Kolumn 3	Rad 2, Kolumn 4	Rad 2, Kolumn 5
Rad 3, Kolumn 1	Rad 3, Kolumn 2	Rad 3, Kolumn 3	Rad 3, Kolumn 4	Rad 3, Kolumn 5

 Nabigu scw wuxuu xadiith ku yiri: ” صلوا كما رأيتموني اصلي” u tukada sidaad aragteen anigoo u tukanaya.

December 9, 2011 – Written by editor